"Оюутолгой" төслийн гэрээ батлагдсантай холбоотойгоор Монголын эдийн засгийн чадавхи, иргэдийнх нь худалдан авах чадвар нэмэгдэх нь тодорхой болсон учир тансаг хэрэглээний бараа, бүтээгдэхүүн үйлдвэрлэгчдийн анхаарал Төв Азийн энэ орон руу хандаж эхлэв" хэмээн Блуумберг мэдээлэв.
Тухайлбал, Женнифер Лопес, Жан Зию нарын оддын гутлыг үйлдвэрлэдэг "Hennessy Louis Vuitton-Sa", "Salvatore Ferragamo Spa" брэндийн дэлгүүрийг Монголын нийслэл Улаанбаатарт нээхээр болжээ. Дэлхийд алдартай "Louis Vuitton" салбар сүлжээгээ 2.7 саяас дээш хүн амтай хотод нээдэг уламжлалаа зөрчин, нэг сая гаруй хүнтэй жижигхэн хотыг ийн онцлон, ирэх арваннэгдүгээр сард дэлгүүрээ нээхээр болсон нь монголчуудын ойрын ирээдүйг өөдрөг байна гэдэгт итгэснийх хэмээн дурджээ
ИВ КАРСЕЛЬ: Монголчуудтай үдсэн энэ үдшийг хэзээ ч мартахгүй
Монголд LV брэнд орж ирлээ. Сарын өмнө төв талбайн зүүн урд хэсэгт нэгэн өвөрмөц барилгыг босгож эхлэхэд "MCS-ийнхэн гутлын дэлгүүр нээх гэж байгаа гэнэ. Үгүй ээ! том шоунд зориулсан тайз засаж байгаа юм" гэх мэт таамаг олны дунд яригдаж байлаа.
Тэгвэл жинхэнэ тансаг хэрэглээг дэлхийд таниулсан Луй Вьюттон дэлхийг хэрсэн салбаруудынхаа 440 дэхийг Монголд нээх бэлтгэлээ хийж байсан нь тэр агаад өнгөрсөн баасан гаригт болсон нээлтийн ёслолын өмнөхөн энэ нууц задарч улаанбаатарчуудад жинхэнэ "сюрприз" барив.
1854 онд Луй Вьюттон хэмээх франц эр аян замын зориулалтаар жижиг цүнх, авдар хийж эхэлснээр "LV" хэмээх алдарт брэндийн түүхийг эхлүүлжээ.
Дээд зэргийн чанар, этгээд чамин ганган, тансаг эд бараатайгаа цуг "LV" зохион байгуулалт гэж юу байдгийг монголчуудад жинхэнэ утгаар нь таниулсан болов уу гэдэг нь нээлтийн ёслолын арга хэмжээнээс харагдаж байсан.
Тэр үдэш "LV"-ийнхний босгосон "чемоданан" байшинд Монголын улстөр, урлаг соёл, бизнесийн салбарын томчууд бүгд цугласан агаад тэрхүү өвөрмөц барилгыг нэг хэсэгтээ л гайхан шагшиж байсан нь учиртай.
Нийт хоёр сая евро /дөрвөн тэрбум гаруй төгрөг. сур/ зарцуулсан энэ барилгын гэрэл чимэглэл, тайз засал энэ тэртэй ярих юм биш. Нэн ялангуяа уг байшингийн ариун цэврийн өрөө, гал тогоо нь юм үзсэн нэгнийг ч алмайруулж байлаа.
"Энэ чигт нь энэ барилгыг аваад үлдчих юмсан. Аливааг ингэж л зохион байгуулмаар юм байна. Үнэхээр мундаг юм аа" гэх яриаг тэр оройн ёслол дээр амтай болгоноос сонсов.
LV-ын Ерөнхийлөгч бөгөөд гүйцэтгэх захирал Ив Карсель, Дэд ерөнхийлөгч Чиэтро Беккари, Монгол болон Хятад дахь салбар хариуцсан ерөнхийлөгч Кристофер Занарди Ланди нар талын Монголд салбар дэлгүүрээ нээхээр ирцгээжээ.
Дэлхийн хэмжээний том брэнд ямархуу зангарагтай хөдөлдгийг манайхан энэ орой сайн мэдэрсэн байх аа! Ёслолын арга хэмжээнд Италийн дуурийн дуучин Оскар Мартос уригдан зочдод ая дуу барихдаа Монголын хөөмийтэй дуурийн дууг хослуулахын гайхамшгийг үзүүлэв. Дэлхийд LV-ийн нүүр царайг Женнифер Лопес, Мадонна, Жастин Тимберлейк нарын одод илтгэдэг. Монголд болох ёслолд тэднийг оролцоно гэж байсан ч энэ удаад хойшилсон тухай сонслоо. Тэр бүү хэл Мадонна авгай Монголд очиж чадахгүй гэсний улмаас LV-ийнхэн түүнтэй хийсэн гэрээгээ хүртэл цуцлахаар "сүрдүүлсэн" гэх яриа ч энэ үеэр дуулдаж байсан.
Харин япончуудын хийсэн "Чингис хаан" кинонд Чингис хааны дүр бүтээж монголчуудад танил болсон жүжигчин арлын орноос LV-ийн урилгаар ирж оролцсоныг манайхан анзаарсан болов уу.
Хонконг, Хятадаас мэргэжлийн бүхэл бүтэн баг ирж дөрвөн цаг гаруй үргэлжилсэн шоуг гайхалтай зохион байгуулсан. Тэр үдэш зочиддоо зориулж "LV" 40 гаруй төрлийн хоол бэлтгэхдээ "Монгол шилтгээн"-тэй хамтарсан гэнэ.
"Монгол шилтгээн" ХХК-ийн ерөнхий менежер нь "Луй Вьюттон"-той хамтрахаар сонгогдсоноо туйлын аз завшаан гэж ярьж байлаа.
"Дэлхийн хэмжээний энэ том брэнд Монголд орж ирж байгаад баяртай байна. Аргагүй л чанар гэдгийг бүх юманд онцолж байна. Маш их зүйлийг энэ хэд хоногт сурлаа. Өмнө нь олон арга хэмжээнд оролцож байлаа. Манайхан бол хоол захиалаад үнээ хямдруул гэхээс өөрөөр яаж байна, юу болж байна, ямар хоол, унд байхав гэдгийг хэн нь ч эргэж хардаггүй, тоодоггүй. Тэгвэл энэ LV-ийнхэн бүх хоолыг нарийн шалгуураар сонгоод хийхээс эхлээд зочдод үйлчлэх хүртэл амталж, шалгаж байна.
Шилэн аяга, хундага сав суулгыг хүртэл нэг хэмжээтэй хэрхэн цэгцтэй сонгосныг та нар харсан байх. Өнөө орой зочдын үйлчилгээнд 130 тогооч, зөөгч, бэлтгэгчийг манайх гаргалаа" хэмээн тодотгосон. Энэ үдшийн дөрвөн цаг гаруй үргэлжилсэн тансаг ёслолд зориулж дөрвөн тэрбум гаруй төгрөгөөр босгосон байшингаа шөнийн 01.30 цаг гэхэд тэд буцааж буулгав. Монголд салбараа нээсэндээ маш баяртай байгаагаа ноён Ив Карсель онцлон "Төв Азийн энэ өвөрмөц оронд очихсон гэж мөрөөддөг байлаа. Миний хүсэл мөрөөдөл биелэлээ. Монголчуудыг тун найрсаг сайхан сэтгэлтэй, бас үнэ цэнийг мэдэрдэг, ганган дэгжин ард түмэн болохыг танилаа. Маш сайхан оройг монголчуудтай ийн үдсэнээ хэзээ ч мартахгүй ээ" хэмээн ярив.
Луйс Вьюттон Монголд орж ирснээ ийн дуулгалаа.
